أكرم توفيق يساوم الأهلي على التجديد: مراته جايبة عرض قطري
الأهلي عايز يجدد عقد أكرم توفيق عشان يحافظ على نجوم الفريق الأساسيين.. وفتح الكلام معاه وقدموا عرض كبيرة وهيكون فيه من الفئة الأولى في العقود.
اللاعب فاجئ أمير توفيق مدير التعاقدات وقاله: “فين هدية الجواز؟.. أنا فاتح بيتين دلوقتي وعايز زي إمام عاشور.. أنا مش أقل منه في حاجة.. وبجيب بطولات زيه.. وضحيت كتير عشان النادي”.
وده اللي عمل أزمة في الفريق.. لكن المفاجأة عنده مراته الجديدة؟.. أيه هي؟ وأكرم عايز أيه عشان يجدد عقده؟.. وأيه حكاية العرض القطري اللي هدد بيه الإدارة؟.. وليه قالهم بيراميدز جاهز وعايز يدفع؟.. ده اللي هنعرفه مع بعض في “قشة لفة بلس”.
مفاوضات أكرم توفيق والأهلي
أكرم توفيق كان حديث الساعة على منصات السوشيال ميديا الفترة اللي فاتت بعد إعلان زواجه للمرة التانية من بلوجر مشهورة اسمها هدير أبو نار.. وإدارة النادي الأهلي عايز تأمن عقود اللعيبة اللي هتنتهى في آخر الموسم ومنهم أكرم توفيق.
وعشان كدا أمير توفيق مدير التعاقدات في النادي قعد مع اللاعب وقدم ليه عرض الإدارة على التجديد قبل فترة الانتقالات الشتوية عشان خايفين اللاعب يغالي في طلبات المالية خصوصا بسبب إغراءات الأندية المنافسة واللاعب هيكون من حقه يوقع لأي نادي في يناير.
مصادر في الأهلى قالت: أمير توفيق عرض على اللاعب تجديد عقده لمدة 4 مواسم تنتهي في صيف 2028.. ورفع قيمته لـ11 مليون جنيه في الموسم بدل 8 ملايين جنيه بياخدها دلوقتي وبكدا هيبقي ضمن رواتب لاعبي الفئة الثانية بالفريق خصوصا أنه واحد من الركائز الأساسية في تشكيلة السويسري مارسيل كولر.
ماذا قالت منى فاروق عن إمام عاشور نجم الأهلي؟
أكرم توفيق وافق على تجديد عقده مع بطل إفريقيا.. لكنه رفض الشروط وطلب رفع راتبه لـ«الفئة الأولى»، عشان يتساوى مع إمام عاشور وحسين الشحات ومحمود كهربا وياخد 15 مليون جنيه فى الموسم.
وقال لأمير توفيق: “أنا عايز أكون ضمن الفئة الأولى زي إمام عاشور ومحمد الشناوي.. أنا مش أقل منهم في حاجة وبلعب أساسي في التشكيل”.
من هي زوجة أكرم توفيق؟
لكن مصدر مقرب من اللاعب قال: “أكرم توفيق عنده عرض قطري مغري وعايز يروح الدوري القطري عشان يبقي جنب مراته الجديد هدير أبو نار اللي عايشة أغلب وقتها في قطر.. واللاعب بيتكتم على العرض وعايز يمشي فى يناير أو بعد نهاية عقده مع الأهلي لو موصلوش لاتفاق يرضيه ويحقق كل شروطه المادية”.
أكرم توفيق لعب مع الأهلي 110 ماتشات سجل فيهم 3 أهداف، وصنع 6 أجوال.. وحقق مع النادي 15 لقب منهم الدوري المصري 5 مرات.. وكاس مصر 4 بطولات.. 3 دوري أبطال إفريقيا، ولقبين سوبر مصر، ولقب كأس السوبر الإفريقي.
لاعب خط وسط الأهلي أعلن يوم الجمعة 6 سبتمبر 2024 زواجه للمرة التانية من صانعة المحتوى والبلوجر هدير أبونار في خطوة محدش كان متوقعها.. والجماهير هاجمت اللاعب اللي كانت بتلقبه بـ”موفاسا” عشان الروح العالية عنده في اللعب.
أكرم كان تزوج لأول مرة في سنة 2020 ورزق بمولوده طفل سماه “توفيق” على اسم أبوه.. ولكن حصلت خلافات مع زوجته الأولى ومحدش عارف السبب.. لحد ما فوجئت الجماهير بلاعب الأهلي ناشر صورته مع مراته الجديدة على ستوري إنستجرام، وعلق عليها بكلمة: “زوجتي”.
زوجة اكرم التانية اسمها هدير أبو نار شغالة بلوجر.. ومسمية نفسها بـ”نفرتيتي”.. ومن مواليد مدينة طنطا.. وتخرجت في كلية الآداب جامعة طنطا.. .. وعايشة حياتها بين مصر وقطر.. وده السبب اللي خلى أكرم توفيق عايز يروح يعيش معاها ويقبل بالعرض القطري.
