بالونة إمام عاشور.. أزمة كبيرة بين الأهلي والزمالك بعد مباراة سموحة
إمام عاشور نجم النادي الأهلي تعمد إثارة الجدل بين جماهير الكرة المصرية بعد الاحتفال اللي عمله في ماتش سموحة اللي اتلعب في دوري نايل.. وكل الناس بتتكلم عليه.. لكن فيه لقطة كانت تستحق تتبروز وتظهر للناس كلها عشان لازم نبين الحاجات الحلوة.
لكن اللي عمله إمام عاشور ومواصلة إثارة الجدل هي اللي مسيطرة على السوشيال ميديا.. أيه اللي حصل؟.. وأيه الفيديو اللي يستحق يظهر للجماهير؟.. ده اللي هنعرفه مع بعض.
صفقات الأهلي الجديدة 2025 قبل كأس العالم للأندية
في مباراة الاهلي وسموحة اللي كانت في الدوري المصري واللي خلصت بفوز الأهلي 2- صفر.. وقدر المارد الأحمر يسترد قمة الدوري المصري بعد ما وصل للنقطة 15 في ترتيب جدول الدوري بفرق نقطة واحدة عن الزمالك صاحب المركز التاني.. حصل فيهم شوية أحداث مثيرة للجدل.. وأهمها احتفال إمام عاشور لاعب الأهلي بالهدف اللي سجله في شباك سموحة.
لكن الفيديو اللي يستحق يتشاف هو اللي حصل على دكة النادي الأهلي لما الجهاز الفني واللعيبة راحوا عند فريق سموحة عشان يسلموا على مؤمن زكريا مدرب سموحة ولاعب الأهلي السابق.. اللي عنده مشاكل صحيته حرمته من لعب الكرة وهو في عز شبابه..
ودي تعتبر لفتة إنسانية مهمة وبتعكس الروح الرياضية خصوصا أن ده بيكون دعم اللاعب اللي بيعاني مع التعب المستمر.
وكمان حاجة تانية حصلت في الماتش وكان البطل فيها جماهير الأهلي اللي هتفت للشهداء نادي الزمالك اللي راحوا في أحداث الدفاع الجوي في 2015 وده رد على هتافات جماهير المصري اللي شتمت الزمالك عشان أحيوا ذكرى ضحايا أحداث بورسعيد في ماتش الكونفدرالية الإفريقية.
لكن الأزمة اللي كل الناس سلطت الضوء عليها هي اللي عمله إمام عاشور وتحديدا بعد تسجيل الهدف التاني للأهلي في الدقيقة 50.. لما راح طلع بالونة بيضاء من الشنكار ونفخها واحتفل بيها وبعد كدا داس عليها بجزمته.. ومن بعدها بقي ترند السوشيال ميديا وخصوصا أن جماهير نادي الزمالك اعتبرت ده إهانة ليهم.
وعشان كدا نجم نادي الزمالك أيمن يونس قال: “احتفال إمام عاشور غير مقبول.. إزاي ينزل مخبي البلونة وإزاي يفكر كده.. وإزاي يلعب للسوشيال ميديا.. وازاي تفكيره يبقى في السوشيال ميديا”.
ده الأهلي.. ده نادي كبير قوي.. الكلام ده كله خارج عن إطار النادي الأهلي.. أنا بالنسبالي تصرفات غير مقبولة ولازم إمام عاشور يراجع نفسه.. اللعيبة مينفعش تفكر في طرق احتفالات خارجة حتى لو لعيبة بتعملها برة النهاردة تصرف إمام عاشور غير مقبول ، ولجنة المسابقات أكيد موجودة وهتكتب كل حاجة.
“رغم قيام البليهي مدافع المنتخب السعودي وفريق الهلال بنفس الاحتفال من خلال استخدام البالونة.. لكن تصرف إمام عاشور بعد تسجيل الهدف الثاني يعتبر مرفوض.. خصوصا أن البليهي بيستخدم بالونة نفس لون تيشرت فريقه”.
المسئولين في نادي الزمالك قرروا أنهم يقدموا شكوى في اللاعب خصوصا أنه بيواصل استفزاز جماهير الزمالك سواء بالهتافات الخارجة مع جمهور الأهلي أو تعليقاته على السوشيال ميديا.
الكابتن محمد رمضان المدير الرياضي في الأهلي جاب إمام عاشور وسألته ليه احتفلت بالشكل ده.. رد عليه وقاله: “فيه نجوم من كرة القدم بيحتفلوا نفس الاحتفال في الملاعب سواء في أوروبا أو في الخليج… أنا اتفرجت على احتفالات اللعيبة بالطريقة دي وأنا قلدتهم معملتش حاجة غلط”.
محمد رمضان طلب من إمام عاشور ضرورة الالتزام في الملعب الفترة الجاية ويركز على تحقيق الفوز والانتصارات مع الفريق.. بدل من الاحتفالات اللي ملهاش لازمة.. وبلغه أن الكابتن محمود الخطيب قرر توقيع عقوبة عليه عشان الاحتفال.
