الإعلامي المتألق محمد المحمودي اتكلم عن اللاعب وقال إنه هيكون مفاجأة الموسم الجاي.. خصوصا إنه عمل زي محمد صلاح.. وهيبقي بديل سوبر لنجم الزمالك المتألق أحمد مصطفى زيزو.
وجوزيه جوميز مدرب القلعة البيضاء مراهن عليه وقال هيبقي البديل الذهبي وهيرعب المنافسين في الدقائق اللي هيلعبها.. مين هو اللاعب ده؟.. وعمل أيه خلى الناس تتغنى بيه؟.. وأيه علاقة بالنادي الأهلي؟.. ده اللي هنعرفه مع بعض في “عرب 22”.
مدرب نادي الزمالك جوزيه جوميز بعد ما لقي الدوري راح منه.. قرر يلعب بالناشئين والشباب ويريح اللعيبة الكبار عشان يستعدوا للموسم الجديد اللي هيبدأ ببطولة مهمة قدم النادي الأهلي في السوبر الأفريقي.
فيديو جمهور المصري.. “التالتة شمال” ترد الجميل لجمهور الزمالك
ومن تجربته للعيبة اكتشف نجم شاب لفت نظره وخلاه اهتم بيه.. وقرر يقيده في قائمة الفريق للموسم الجديد في المسابقات المحلية وكمان إفريقيا عشان يشارك مع الزمالك في بطولة كاس الكونفدرالية اللي هيشارك فيها الزمالك بصفته بطل النسخة الماضية وثالث الدوري المصري.
الإعلامي محمد المحموي اتكلم عن اللاعب وقال اسمه أحمد عبد الرحيم إيشو عنده 21 سنة ولعيب هيكون مفاجأة وهامش التطور عنده بدأ يعلى وكمان استلامه للكرة بقي متطور
المحمودي قال إن إيشوا عمل زي كابتن منتخب مصر ونجم الريدز محمد صلاح في القياسات البدنية اللي عدى من كل لعيبة ليفربول.. وده اللي حصل في معسكر نادي الزمالك.. وقدر إيشوا يعمل 21 دورة وده أعلى معدل وصل ليه أي لاعب في الدوري المصري.
من هو أحمد عبدالرحيم إيشو
وجوميز منبهر باللاعب وشايف إيشو مش مجرد لاعب صغير.. وقال عليه ده هيكون البديل السوبر لنجم الزمالك المتألق أحمد مصطفى زيزو وهيعمل زي إمام عاشور نجم الأهلي وقت ما كان لسه مبتدئ وقدر يسد الفراغ اللي سابه لاعب منتخب تونس فرجاني ساسي اللي ترك الفريق قبل نهاية الموسم ولعب إمام وعمل أداء كويس.
إيشو بيلعب في مركز خط الوسط في نادي الزمالك ومنتخب مصر تحت 20 سنة.. وانصم للزمالك في سنة 2013، بعدما نجح في الاختبارات اللي خضع ليها تحت إشراف الكابتن محمد عبدالمعطي.
إيشو قال إنه مثله الأعلي هو شيكابالا كابتن الزمالك ونفسه يتوج ببطولة إفريقيا مع الفريق الأول.. ويكون عنصر أساسي ويقدر يحقق بطولات وبعدها هيفكر في تجربة الاحتراف.
أحمد عبدالرءوف المدير الفني لفريق الناشئين بنادي الزمالك مواليد 2003 أشاد بإمكانيات وقدرات إيشو وقال عليه من أفضل لاعبي قطاع الناشئين بالنادي وعنده إمكانيات فنية ومهارية مميزة.. وهيكون واحد من نجوم الفريق الأول في السنين الجاية.
وكمان الإعلامي أحمد شوبير حارس مرمى الأهلي السابق اتكلم عن اللاعب بعد تألقه مع منتخب مصر الأولمبي وقال: عايز اتكلم عن أحمد عبدالرحيم إيشو لاعب نادي الزمالك، أبوه عبدالرحيم حلمي كان زميلي وكان حريف جدا، من أمهر اللاعبين في تاريخ مصر.. وهيبقي زي أبوه.
إيشو شارك مع الزمالك في المباريات الأخيرة من الدوري موسم 2023- 2024 ولعب مباراة الكاس قدام طلائع الجيش وسجل هدف التقدم لكن الفريق خسر من الطلائع في ركلات الترجيح بعد التعادل 1-1 في الوقت الأصلي والإضافي للمباراة.
اللاعب كان عامل أزمة في بداية مجلس الكابتن حسين لبيب ورفض تجديد عقده.. ومصدر في الزمالك قال: “اللاعب رفض كل المحاولات اللي أجراها النادي لتجديد عقده في الفترة الحالية.. لكن بعد كدا اتصل بعبدالواحد السيد مدير الكرة واعتذر عن فترة عدم تواجده مع الفريق وطلب منه التواجد في مؤتمر تقديم الصفقات وجدد عقده”.
هو عايز يحترف برة مصر لكن عن طريق الزمالك ومش بالتمرد عليه.
