رياضةسلايدر

بيعمل زي محمد صلاح.. من هو موفق رامي مهاجم الأهلي الشاب؟

المستشار تركي آل الشيخ رئيس هيئة الترفيه السعودية كان عايز يخطفه وقاله تعال معايا في النادي.. وفريقه طلع بيان يرد عليه وقاله النجم ده بتاعنا.. اللاعب ده رجع على الأهلي عشان يكون مهاجم الفريق.

وغالبا هيقعد “وسام أبو علي” على الدكة.. خصوصا أنه واخد محمد صلاح قدوة ليه.. وبيعمل زيه بالظبط.. مين هو اللاعب ده؟.. وإزي هو قناص وبيعرف بيرقص ويجيب أجوال؟.. وأيه علاقته بنجيب ساويرس؟.. ده اللي هنعرفه مع بعض في “عرب 22”.

المسئولين في النادي الأهلي قدروا يتعاقدوا مع موهبة الدوري المصري اللي لفتت نظر المستشار تركي آل الشيخ في صفقة انتقال حر يعني مدفعوش مليم في اللاعب.. وكمان هياخد مرتبه بالجنيه المصري.. وهيقدر الفريق الأول يستفيد منه في أي وقت.

اللاعب ده اسمه موفق رامي رمضان عوض كان بيلعب مع نادي يو إي فيلاسار دي مار الكتالوني.. ونشر صورة ليه على حسابه مع وليد سليمان مدير قطاع الناشئين في الأهلي.. وقال إنه وقع للقلعة الحمراء في صفقة انتقال حر بعقد مدته 5 سنين.

موفق رامي من مواليد سنة 2005 وبدأ مشواره مع كرة القدم في نادي زد من 4 سنين.. وبيلعب في مركز المهاجم الصريح.. وتدرج في صفوف نادي زد لحد ما بقي كابتن الفريق وسافر سنة 2023 لإسبانيا عشان يحترف في نادي يو إي فيلاسار دي مار.. وليه تجارب معايشة في أندية أوروبية زي نادي سوشو الفرنسي.

ورجع في فترة الانتقالات الصيفية على الدوري المصري من بوابة النادي الأهلي بعد ترشيح ومباركة من تامر حنفي نجم الأحمر السابق ومكتشف اللاعب.

تألق اللاعب لفت نظر المستشار تركي آل الشيخ رئيس هيئة الترفيه السعودية ومالك نادي ألميريا الأسباني اللي نشر صورة للاعب وكتب عليها: “انتظرك يا موفق في ألميريا.. تخوض الاختبارات مع الناشيئن”.

والمسئولين في نادي زد ردوا عليه وقالوا: “بعد نجاح كبير حققه نادي زد إف سي بقيادة المدير الفني أسامة نبيه وقدر يطور المواهب الشابة عشان يبقوا على مستوى عالمي من الاحتراف.. ما جعل أنظار الأندية الرياضية على مستوى العالم تتجه صوب اللاعبين ومنهم اللاعب موفق رمضان عوض الله”.

اللاعب اتكلم عن حلمه بعد الاحتراف في أسبانيا وقال: “بدأت من 3 سنين مع كابتن تامر حفني؛ اللي جمع فريق من فرق الجمهورية.. وساعدني في نادي زد على تكوين شخصيتي وألا استسلم وأن يكون لديّ أهداف عايز أوصل ليها”.

اللي يميز لاعب عن آخر في الاحتراف هو الاستمرار.. وبيتم توجيه ليا الكتير من النصائح عن ضرورة ألا استسلم واستمر ومرجعش غير وأنا حاجة كبيرة.. وده أمر بيحفزني مرجعش غير وأنا في نادي أوروبي.

أهم شيء للمحترف هو الاستمرارية.. العقلية والاهتمام بأدق التفاصيل والأشياء الصغيرة هي اللي بتميز لاعب عن غيره.. وباشتغل على الجانب البدني وبتابع مباريات الفريق اللي هنضم ليه لمعرفة طريقة لعب المدرب.

وعايز أوصل لأندية أوروبا خصوصا نادي برشلونة وأكون الهداف التاريخي ليه.. ودي الحاجات اللي بتميز محمد صلاح كابتن المنتخب عن باقي اللعيبة في مصر زي العقلية والتطور.

النادي الأهلي خلص صفقتين جديدتين عشان يشاركوا مع الفريق في الموسم التاريخي اللي داخل ليه وهما المدافع القطري من أصول مصرية يوسف أيمن من نادي الدحيل القطري على سبيل الإعارة مع أحقية الشراء، والظهير الأيسر المغربي يحيى عطية الله من نادي سوتشي الروسي على سبيل الإعارة مع أحقية الشراء.. والمدافع أشرف داري من الدوري الفرنسي.

مقالات ذات صلة

زر الذهاب إلى الأعلى