رياضة

فيديو جمهور المصري.. “التالتة شمال” ترد الجميل لجمهور الزمالك

اللي حصل من جمهور المصري في ماتش الزمالك ميبشرش بالخير أبدا.. إزي يشتموا جماهير الزمالك عشان بتدعم أخواتنا الشهداء اللي راحوا في أحداث بورسعيد.. ده ممكن يرجعنا سنين للخلف.

ويعمل أزمة كبيرة ومشاكل إحنا مش قدها.. وعشان كدا الكابتن حسين لبيب ومحمود الخطيب اتحركوا ووقفوا مع بعض بعد اللي حصل من جماهير المصري.. وكمان جمهور الأهلي طلع ورد الجميل لجمهور الزمالك.. وهي دي فعلا المنافسة.. أيه اللي حصل؟.. والخطيب ولبيب عملوا أيه؟.. وكامل أبو علي رئيس النادي المصري هيعمل أيه؟.. ده اللي هنعرفه مع بعض.

في البداية كدا من بعد أحداث بورسعيد في 2012 وأحداث ستاد الدفاع الجوي في 2015 وجماهير الأهلي والزمالك اتعودت تنور كشافات الموبايلات في الدقيقة 22 و74 لتخليد ذكرى شهداء الكرة المصرية.. لكن المثير والغريب اللي حصل في ماتش الزمالك والمصري في بطولة الكونفدرالية الأفريقية.

جماهير الزمالك ولعت الكشافات في الدقيقة 74 واتفاجئت بجمهور المصري اللي موجود في ستاد برج العرب بيوجه سباب وشتايم وخروج عن النص لجمهور الزمالك.. وكمان النادي الأهلي والزمالك.

لكن عشاق القلعة البيضاء علموا جماهير المصري درس في الأخلاق والمبادئ وكملوا إحيائهم لتخليد أخواتهم من شهداء جمهور الأهلي.

طبعا الفعل ده ضايق كل عشاق الكرة في مصر.. وزعل جماهير الأهلي اللي قررت أنها ترد الجميل لجماهير الزمالك وشكرتهم على السوشيال ميديا وكمان قرروا أنهم يشكروهم بطريقتهم في ماتش الأهلي وسموحة في الدوري.

وقرر جمهور الأهلي في التالتة شمال يرفع لافتة شكر كبيرة لجماهير نادي الزمالك عشان احترامهم لحرمة ضحايا النادي الاهلي وردهم على اللي حصل في مباراة المصري الأخيرة.. ودي لقطة كويسة ومحترمة.. وجماهير نادي الزمالك تستحقها عن جدارة.. خصوصا أنهم مش أول مرة يدافعوا عن جماهير الأهلي.

وكمان الإعلامي أحمد شوبير المذيع في قناة الأهلي اتكلم عن الأزمة دي وقال: “جمهور الاهلي والزمالك مهما تشوفهم على السوشال ميديا من تحفيل أو غيره.. لكن عندهم ثوابت معينة.. عمرهم ما يخرجوا عنها.

لما تلاقي جمهور الزمالك يرفع في الدقيقة 74 والاهلي في الدقيقة 20 تخليدًا للشهداء.. اتفاق لا مكتوب ولا معلن.. لكن مشاعر توارثتها الجماهير في المدرجات..

دا لما بيلاعبوا بعض بيعملو نفس الكلام.. فيقوم امبارح من عدد قليل من جمهور المصري.. يلاقوا جمهور الزمالك رفعوا الموبايلات ترحمًا على جمهور الاهلي وهاتك يا شتايم.. أنا والله العظيم ما صدقت، كلمت حد قالي دا حصل فعلا للأسف.

اتحاد الكورة لازم يتصدى للي حصل ده.. وعلى مجلس إدارة المصري برئاسة كامل أبوعلي يقدم اعتذار على اللي حصل.. ويجب محاسبة القلة اللي خرجت عن النص من جماهير المصري البورسعيدي عشان مندخلش في نفق مظلم جديد.

وعشان كدا الكابتن حسين لبيب رئيس نادي الزمالك ومحمود الخطيب رئيس النادي الأهلي.. اتفقوا أنهم لازم يواجهوا الظاهرة دي عشان الموضوع ده ميتكررش تاني خصوصا ان الكرة المصرية مش ناقصة أزمات.. وهم عايزين الجماهير ترجع تحضر من تاني وتملى المدرجات اللي بقيت فاضية.. واللعيبة مش عارفة تلعب تحت ضغط الجماهير.

مصادر قالت: الخطيب وحسين لبيب تواصلوا مع المسئولين في اتحاد الكرة برئاسة هاني أبو ريدة ووزارة الشباب والرياضة ورابطة الأندية المصرية واتفقوا معاهم أن لو حصل حاجة زي دي في الدوري يوقعوا عقوبات قاسية على الجمهور المصري.

لكن محدش هيقدر يحاسب جماهير المصري على اللي عملته في مباراة الزمالك في الكونفدرالية عشان تنظيم البطولة مش خاضع للمسئولين المصريين.. واللي بينتظم الماتش الاتحاد الأفريقي لكرة القدم “كاف” واللي شايف أن الهتافات مفهاش حاجة خصوصا أن الحكم مكتبش حاجة في تقرير المباراة.

مقالات ذات صلة

زر الذهاب إلى الأعلى