رياضةسلايدر

لماذا رفض الزمالك على معلول نجم الأهلي؟

التونسي علي معلول هو واحد من أهم اللاعبين الأجانب اللي مروا على ستاد التتش.. وعشان كدا الأهلاوية بيعشقوا اللاعب وبيعتبروه مصري زيهم مش محترف خصوصا عشان قلبه على النادي مش بس بالبطولات اللي كسبهم.. ويعتبر واحد من اللعيبة اللي الأهلي كسر القواعد عشانهم.

وده اللي خلى الكابتن الخطيب يوعد بتجديد عقده وهو مصاب.. لكن المفاجأة في أن اللاعب اتعرض على الزمالك واترفض من إدارة القلعة البيضاء؟.. إزي ده حصل؟.. وليه الزمالك رفض اللاعب؟.. وأيه الرسالة اللي بعتها ليه الكابتن محمود الخطيب؟.. ده اللي هنعرفه مع بعض في “عرب 22”.

علي معلول كتب تاريخ كبير مع النادي الأهلي في الفترة اللي قعدها مع الفريق.. وعشان كدا غيابه أثر على الفريق وساب فراغ كبير وراه وده اللي خلى المدرب السويسري يطلب توفير بديل ليه في أسرع وقت.. لكن الكابتن محمود الخطيب رئيس الأهلي جاب البديل وصمم أنه يجدد لعلي معلول لمدة سنة عشان يكمل مع النادي.

لكن المفاجأة اللي فجرها أحمد حسام “ميدو” نجم منتخب مصر والزمالك اللي حكى عن واقعة عرضه نجم منتخب تونس على الزمالك اللي رفض المسئولين يضموه.

الواقعة قديمة وبترجع لقبل تعاقد الأهلي مع اللاعب.. لكن إحنا هنحكيها بمناسبة تكريم الأهلي للاعب وتجديد عقده ودوره مع الفريق.

ميدو اتكلم عن الصفقة وقال: “عندي معلومة مؤكدة وعارف تفاصيلها كويس جدا.. علي معلول قبل انتقاله للأهلي بموسم واحد اتعرض على الأهلي والزمالك، والناديين وقتها رفضوا..

الوكيل عرض معلول على القطبين في أسبوع واحد.. لكن الأهلي والزمالك كانوا لا مش عايزين يتعاقدوا مع لاعب أجنبي في مركز الظهير الأيسر”.

وفي الموسم التاني الأهلي قرر التعاقد مع علي معلول.. عشان سيد معوض كان قريب من الاعتزال.. والأهلي كان عايز لاعب كويس.. ولقي معلول.. ووقتها المستشار مرتضى منصور رئيس نادي الزمالك رفض وقال هدفع المبلغ ده كله في مدافع.. المهاجم أهم.

وبعدها انضم معلول لصفوف النادي الأهلي في فترة الانتقالات الصيفية سنة 2016 من فريق الصفاقسي التونسي.. وقدم أداء مبهر مع الأهلي وساهم في تحقيق عدد كبير من البطولات.

عقد معلول انتهى لكن إدارة القلعة الحمراء توصلت لاتفاق معاه علي التجديد.. لكن هيتم رفع اسمه مؤقتا من قائمة الفريق عشان الإصابة الكبيرة اللي عنده وهيتم قيده في شهر يناير 2025.

وده اللي أكد الإعلامي إسلام صادق اللي قال: “النادي الأهلي اتفق مع علي معلول الظهير الأيسر للفريق الأحمر على التجديد لمدة موسم قابل للتجديد موسم آخر مقابل مليون و100 ألف دولار في الموسم الواحد.. الأهلي وضع الروتوش الأخيرة على تجديد العقد”.

مصدر في النادي الأهلي قال: “علي معلول معترضش على أي شيء وتم الاتفاق معاه على تمديد عقده لمدة سنة في تقدير من الأهلي لتاريخ اللاعب الكبير في القلعة الحمراء.. ومعانا موعد القيد الشتوي 4 شهور.. منهم 3 عشان يخف معلول بشكل كامل من الإصابة

الكابتن محمود الخطيب بيقدر علي معلول بصورة كبيرة واتصل باللاعب وبلغه فيه بخروجه من القائمة وأنه هيتقيد في شهر يناير.. وقاله سياسة كولر معروفة ليه كلاعب من حيث عدم الدفع باللاعب العائد من إصابة إلا بعد تعافيه بشكل كامل.

والخطيب طمن معلول أن مكانه في الأهلي موجود ومفيش قلق، وقال له: “إحنا شارينك ولو فيه أي شيء مكنش جددنا معاك سنة، وفي يناير هتعود لقائمة الفريق بدون أزمة.. وإحنا بنجهّز حلول لكل حاجة سواء برحيل بيرسي تاو أو البحث عن حل آخر”.

مقالات ذات صلة

زر الذهاب إلى الأعلى