مش عايزين فضيحة تاني قدام الأهلي.. كفاية الانسحاب من ماتش القمة في الدوري.. ولازم نكسب السوبر الأفريقي بأي طريقة.. ده جزء من كلام واحد من أهم رجال مجلس إدارة القلعة البيضاء في الاجتماع اللي حصل بعد كأس مصر وخروج الفريق من طلائع الجيش.
لكن حصلت خناقة في مجلس الإدارة بعد الخسارة والتخبط اللي حصلت في الدوري.. وعضو المجلس انتقد الانسحاب من القمة.. وهاجم زمايله عشان موقفهم من أحمد سيد زيزو والصفقات المتأخرة.. أيه اللي بيحصل في مجلس إدارة الزمالك؟.. ومين الصفقات اللي هيجيبها حسين لبيب؟.. وليه جوميز قال هكسب الأهلي 3- صفر؟.. ده اللي هنعرفه مع بعض.
كل حاجة اتغيرت في الزمالك بعد الخروج من كاس مصر على يد طلائع الجيش.. والموسم الصفري اللي عمله الزمالك.. وكل واحد في مجلس الإدارة كان بيرمي المسئولية على زميله.. وحصلت مشادة كبيرة في الاجتماع اللي انعقد بعد الخسارة اللي أغضبت جماهير القلعة البيضاء.. وانتقدوا إدارة جوميز لفريق الكرة في الموسم اللي فات.. وأحمد سليمان قال أيه اللي كسبناه من الاعتذار عن ماتش الأهلي؟.
الكابتن حسين لبيب قرر أنه هيعمل تغيير شامل في إدارة الكرة في الزمالك.. وكلف الجنرال أحمد سليمان بالإشراف على ملف الكرة معاه ومفيش حد تاني هيتدخل ولا يتكلم في أي صفقات.. وكمان عايزين يجيبوا الكابتن حسن شحاته نجم الزمالك عشان يبقي هو المسئول عن كل حاجة زي الصفقات وملف المدير الفني.
والمعلم هيعمل لجنة فنية هتكون مهمتها التخطيط للقلعة البيضاء في التعاقدات والصفقات.. بالتعاون مع المدرب البرتغالي جوزيه جوميز.
الجماهير هاجمت حسين لبيب عشان الصفقات المتأخرة وخصوصا أن الأهلي قدر يضم أكتر من صفقة مهمة وبيتفاوض مع أسامي كبيرة.. وكان كدا بيسعى أنه يدعم الفريق بلعيبة سوبر من الموجودين في الدوري المصري.. واتفق خلاص مع الدولي المغربي أشرف بن شرقي على العودة للقلعة البيضاء من تاني.
وهيجدد عقد أحمد سيد زيزو اللي فيه كلام على بيعه لفريق نيوم السعودي مقابل 5 مليون دولار عشان يحلوا الأزمة المالية وهيشتروا بفلوسه لاعبين سوبر في خط الهجوم ومركز الباك ليفت
الزمالك دخل في مفاوضات مع عبدالعزيز البلعوطي حارس فريق إنبي ومحمد حمدي الظهير الأيسر، لكن النادي البترولي عايز 15 مليون جنيه في البلعوطي والزمالك عرض 7 مليون.. وعايز يطلع محمد حمدي بعقد زي اللي حصل مع زياد كمال وده اللي رفضه الزمالك..
ورجع ليهم اللاعب وقالهم مش عايزه يكمل معايا.. ودخل الزمالك في مفاوضات الكاميروني جوناثان نجويم لاعب مودرن سبورت لكن لسه المفاوضات شغالة مع مودرن.
وكمان فيه صفقة أحمد رمضان بيكهام مدافع سراميكا كيلوباترا ولاعب الأهلي السابق اللي الزمالك عايز يجيبه عشان يقيده مع الصفقات الجديدة في السوبر الأفريقي اللي هيتلعب يوم 27 سبتمبر 2024.
وعشان كدا إدارة الزمالك طلبت من جوميز يحدد قائمة بأسامي اللعيبة اللي هيستغى عنهم.. ومصادر قالت: “إدارة الزمالك استقرت على المبالغ المستحقة لأصحاب الديون عشان يسرعوا في التسديد ورفع عقوبة القيد”.
البرتغالي جوزيه جوميز إدارة الزمالك جابته وناقشته في اللي عمله مع الفريق خصوصا أنه أدي إجازة لكل اللاعبين الأساسيين.. لكن هو وعد الإدارة بتحقيق الفوز وقال: “هدفنا الفوز في لقاء السوبر الأفريقي.. الماتش صعب للغاية.. بس هنسعى لتحقيق الفوز.. وهدفنا هيكون قفل المساحات قدام قوة الأهلي.. وعندنا إمكانيات كبيرة بالفريق تستطيع التعامل مع اللقاء.. وهنكسب 3-صفر”.
